Ecc 3 | TVK | STEP | Holesok xil xa di mistal e ut etan, Hi miling xat melele teni xil.

Ecclesiastes 3

Hi Pol ni Holesok Xil Ngasen Mistal Momal ni Melele Xati Teni

Eklisiastes 3:1-8, 11-17

1 Holesok xil xa di mistal e ut etan,
Hi miling xat melele teni xil.
2 Hi miling melele te poten e melele te mat en,
melele te luh en e melele te leh anien en.
3 Xi miling melele te has vinien e melele te tal rat meseien en,
melele te hu len ni en e melele te pet rati en.
4 Hi miling melele te muis en e melele te sien,
melele te tang en e melele te hol en.
5 Xi miling melele xa tiramue ba pus atou en e melele xa tave ti sangas, ^{▼▼3:5 Moletin xil hao labit ngan ak be koute te sepinien xa bit, 'Xi miling melele xa tiramue ba miso hat xil e melele xa miso viton ni.'}
melele te maheah xati en e melele xa lastokovein ni en.
6 Hi miling melele te kamet neta en e melele xa mikesae,
melele te hur xat neta en e melele xa laso ni ba.
7 Xi miling melele te tal pas eising en ve tangen e melele xa ladil pilei,
melele te tat votei en e melele te sepinien.
8 Hi miling melele te ekaten e melele te eheien,
melele te vaeen e melele te tomat.

11 Hi pol ni holesok xil ngasen mistal momal ni melele xati teni. E neta sav tei mun xa Hi miling e moletin xil be kilakilen tengan lanem usil naha xa testal ngamu e naha xa mei ti istal. E neta sav xa mak, lasakras lakil sen vatit polien na Hi mu hoxalite teni. 12 Ma nanem kila xa bos mak mu xa rihesi xir tang e ripus hosien e melele xa rameul tamu radi. 13 Bos xa xir vus ti rianien, ti rimun, e ti rihesi xir ve holesok xil xa di rapol ven, vengan xa holesok xil ak be sanien na Hi mi xir.

14 Inou nakila xa holesok xil vus xa Hi pol ni iti ihehi. Rasakras raso rin ni, e rasakras raleh rat ti neta relingi. Hi pol ni mak tengan moletin xil ti limerere ni e limot mini. 15 Holesok eah xa di taxeak, teti ngamu; e naha xa itutou imei, di taxeak. E holesok xil xa testal tetiamu, Hi ti ileh xil mei listal rilomun.

16 E neta tei mun xa napusi, e ut etan, tesaen di tuei e von lepisien. Reitin, di ngamu e rute xa di lamal ni rin na moletin xil en. 17 Di, nasep tasok nabit, “Hi ilepis moletin xil vus, ngan xil xa labos e ngan xil xa lasa; vengan xa xi miling xat melele xati te sexien xil e polien xil vus.”